Masha ni kabai kau ai maza kaw na, sut hpaga bungli langai byin wa na re ngu, kadai mung n myit sawn hkrup na re.
Kabai kau ai maza ngu tsun ai shaloi, masha law malawng gaw nsan seng ai, akyu n rawng ai arai ngu shadu yang mung shadu na re.
Raitim, shayi/hpawmi Naw Eh Wah gaw kadai mung n shadu da ai, masha ni kabai kau ai maza kaw na sut hpaga bungli langai hpe gaw de hpang la lu ai zawn, bungli shara hta mung woi awn ningbaw nga ai myu shayi langai rai nga ai.
Shi gaw 2014 ning kaw nna, masha ni kabai kau ai hka-bu, magazine laika buk dingsa, shi laika dingsa hte sumpan chyen ni hpe madung jai lang nna hpaga bungli langai hpe awng dang ai hte gaw de hpang la lu sai re.
“Madung gaw, kabai kau ai maza ni kaw na masha ni lang hpa arai byin hkra, mawn sumraw arung arai galaw shapraw ai ngu mai tsun nga ai” nga nna Amazing Grace ngu ai seng mying hte sut hpaga bungli hpaw hpang wa ai Naw Eh Wah kawn tsun dan ai.
Amazing Grace seng hpe gaw Yangon mare kaba hta hpaw da ai re.
Naw Eh Wah gaw lata hpaji hpe myit lawm ai wa re ai hte maren, kabai kau ai arung arai ni hte ta lahkawn, kachyi, na-ladan zawn re ai hkum hta sumraw hpa arai ni hpe gyin shalat ai sut hpaga bungli hpe woi awn galaw nga ai wa ngu yang mung, n shut nga ai.
Ndai bungli hpe nnan galaw hpang wa ai shaloi, gaw-ningja re ai myu shayi ni hpe karum mayu ai, myu shayi ni hpe bungli lu shangun mayu ai myit hte hpang wa ai rai nga ai.
“Nnan e gaw, ngai mung yu maya magam gun langai sha re. Ngai gaw lata hpaji hpe kaji ten kaw na myit lawm ai le. Bungli n lu ai myu shayi ni, gaw-ningja re ai myu shayi ni hpe karum mayu ai myit hte ndai bungli hpe hpang wa ai rai nga ai” nga nna Naw Eh Wah gaw bungli nnan hpaw hpang wa ai lam hpe tsun dan ai.
Kabai kau ai arai ni hpe jai lang nna, lata hpaji arung arai gyin shapraw ai re majaw arang n law ai sha shingni maka hte bung ai hku gyin shalat da ai re majaw, Amazing Grace a gunrai ni gaw maigan gat-lawk de du hkra lu shabra nna, magam gun masha lawlaw hpe mung Naw Eh Wa gaw shalat da lu sai rai nga ai.
“Ginhtawng ten, mung masa pyaw ai aten ni hta gaw n rau n htau rai hkra galaw shapraw ra ai” nga nna lai wa sai ten na lam hpe mung tsun jahta dan nga ai.
Shi a magam bungli awng dang wa na matu, myit lawm lam bung ai gaw-ningja myu shayi magam gun ni a karum shingtau lam mung grai lawm nga ai lam hpe tsun dan ai.
“Ngai a bungli hta magam gun ni malawng gaw myu shayi ni re. Bai nna, gaw-ningja re ai myu shayi ni, na hte seng nna manghkang nga ai (na hpang ai) myu shayi ni law ai” nga nna magam gun masha ni a masa lam hpe mung tsun dan nga ai.
Bungli shara, sut hpaga bungli langai aten galu ngang-grin nga na matu gaw, magam gun masha ni hpe hparan hpareng ai lam mung ahkyak ai lam re ai hte maren, shi a matu yakhkak lam kaba langai mi rai wa sai.
Shi gaw, yu-maya magam gun masha langai kaw nna bungli madu tai wa ai shaloi, bungli galaw masha ni hpe hparan hpareng ai lam hta gawngkya ai a majaw, shi hte ta gindun let bungli rau galaw ai ni kaw na nkau mi gaw hkring mat ai ni mung nga ai lam hpe tsun dan nga ai.
Madu a magam gun masha ni bungli pru mat wa ai shaloi, madu a hparan hpareng ai lam gawngkya ai majaw kun, kaga lam ni a majaw kun ngu ai hpe galoi mung bai masam maram yu ai lam hpe mung, Naw Eh Wa gaw bungli shara na mayak hpe tsun dan wa ai.
“Ngai a magam gun masha ni gaw myu shayi ni, gaw-ningja ni law ai. Magam gun masha ni hpe hkang zing da lu na matu gaw yak ai. Nkau mi gaw shanhte a dinghku hte re ai majaw, matut nlu galaw mat ai ni mung lawm nga ai” nga nna myit n pyaw let tsun dan nga ai.
Ya ten hta gaw, mung masa manghkang a majaw garan mat ai, bungli hkring mat ai ni lawm ai zawn, nkau mi gaw dinghku de ai, kun dinghku nga wa ai majaw bungli kaw na hkring mat ai ni mung lawm ai.
Shi a matu kaga mayak, myit tsang hpa langai gaw “anhte gaw ndai mawn sumraw hpa arai ni hpe galaw shapraw ai shaloi, nhprang rai hpe kabai kau ai arai, sumpan ngam ni hte galaw ai re majaw, mari ai masha ni n nga wa na hpe mung tsang ai” nga nna tsun ai.
Anhte Myanmar mungdan na shinggyim uhpung uhpawng ni a moi prat na htung tara, makam ni hpe manat da ai lailen a majaw, lang ngut chyalu sumpan ni hte lata hpaji arung arai galaw shapraw ai hpe n ra sharawng ai lam ni mung nga ai hpe, Naw Eh Wa gaw shi a mahkrum madup hpe tsun dan ai.
Madung gaw, palawng chywi ngut nna ngam ai sumpan, bawsang htunghking labu palawng ni chywi ai kaw na ngam ai sumpan ni hpe kabai kau na malai, shalat maka kachyi, na ladan, ta lahkawn ni hpe bai galaw yang, mawn sumraw hpa arai bai lu wa ai rai nga ai.
“Nkau mi gaw, masha ni buhpun chyalu labu palawng ni hte bai galaw ai i, nga nna san ma ai. Anhte Myanmar mung kaw gaw masha ni hpun chyalu hpun palawng ni gaw, n kaja/yuk ai ngu ai makam myit a majaw dingsa ni hte gaw n galaw ai. Raichywi seng kaw na lu ai sumpan ngam ni hte sha galaw ai. Ra jang gaw labu langai nawng mari kau ai” nga nna Naw Eh Wa gaw tsun dan ai.
Myu shayi langai raitim, mayak lawlaw nga ai lapran hta shi a makam myit hpe n shayawm ai atsam marai hte ndai mawn sumraw arai ni galaw shapraw nna, bungli atsawm kri nga lu na matu dating let shakut shaja nga ai rai nga ai.
Ya ten hta, shi a shakut shaja ai lam a majaw magam gun masha lawlaw hpe lu shadat da sai hte, shinggyim uhpung uhpawng ni mung hkapla wa sai rai nna, lata hpaji gyin shalat ai wunkat ni hpe mung jaw taw nga sai re.
“Ngai na seng langai sha hpaw ai nre, wunkat ni mung jaw ai. Ma ni hpe lata hpaji sharin ya ai, gaw-ningja myu shayi ni hpe mung shang gumhpraw lu ai bungli hte lu tsap hkra sharin ya nga ai” nga nna tsun ai.
Ya ten hta, Myanmar mungdan a mung masa, sut masa lam shagu hta hkrat sum nga ai ten re majaw, Naw Eh Wah mung shi a magam gun masha ni bungli n dinghprut mat na matu hte, shi a seng ngang grin nga na matu myit tsang taw ra ai aten mung rai nga ai.
“Moi Covid n byin shi ai ten hkan gaw grai lu dut ai. Maigan masha ni gaw grau mari ma ai. Bungli galaw masha ni mung marai 30 du hkra nga ai. Covid hte mung masa a majaw manam ni mung bai wa mat ai, bungli dabang nkau mung pat kau ra ai. Magam gun masha mung shayawm kau ra ai lam ni nga ai. Grai gaw shakut taw ra nga ai” nga nna ya ten na masa lam hpe mung tsun dan nga ai.
Yakhkak ai lam lawlaw lapran hta raitim, shi hku nna myu shayi ni hpe, tinang a makau grupyin hkan nga ai arai ni hte shang gumhpraw gara hku tam na, ngu ai hpe galoi mung myit nna shakut na matu n-gun jaw ga tsun dat ai.
“Myu shayi marai hkum shagu gaw ram ai ni re. Galoi mung myit yu sawn yu nna nga na hpe n-gun jaw mayu ai. Ga shadawn, tinang a makau kaw nga ai arai lama ma hte shang gumhpraw lu hkra gara hku galaw na ngu ai zawn re ni. Bai nna, gunrai langai ngai galaw shapraw nna, dai hpe gat-lawk hte shang hkra n hkrit n gaya ai sha dut chyam yu ga. Ngai nga yang, makau kaw nga ai magazine laika buk ni mung, ngai na matu gumhpraw rai nga ai” nga nna n-gun jaw ga hpe tsun ai.
#shayichannel
#womenbusinessowners
#recycling
