Amyu shayi ni hpe sut masa lam a matu a hkyak ai shara ni hta myit shalawm na malai, myit n krem lu ai wuhpung langai zawn sha anhte mu mada nga ga ai. Dai hta na sut hpaga madu ni hte ni nawn ai amyu shayi nkau mi chyu sha sut hpaga lam ni hta gasang galang shanglawm lu nga ma ai raitim, law malawng gaw dinghku kata na lu lu, lu sha lam kaw sha kyin kadut rawng ng anna, sut hpaga bungli madang de hkam shing-rau lu ai lam ni n nga shi ma ai hku re.
Myitkyina, Jan Mai Kawng lawk hta bungli masha marai 30 jan hte bungli galaw taw nga sai”Hkahku Htunghking Rida Maka Dalang ” bungli hpe Jan Hkawn Nu ngu ai amyu shayi langai woi awn galaw hpang wa sai re. Ndai zawn byin wa lu na matu yakhkak ai lam amyu myu hkrum lai wa nna aten galu arang bang nna shakut lai wa ai lam hpe na chye lu ai. Ya ten hta gaw madu dalang magam bungli hpe woiawn nga ai hta sha n ga “Turquoise Mountain” ngu ai mungkan wuhpung kaba langai hta Jinghpaw mungdaw a lithkam (coordinator) langai hku shanglawm let htunghking ta maka hpaji ni dam lada wa na matu tatut hkrang shapraw taw ai wa mung rai nga ai.
Jan Hkawn Nu a kahpu kanau majing marai (4) kaw na kaji htum num kasha langai rai nga ai. Ya ten shi gaw ma (3) a kanu rai nga ai. Moi kaji ten kaw na kawoi dwi hte rau nga kaba wa nna kawoi dwi da da yang makau kaw a yan nga ai hku re. Dai majaw da da bungli hpe myit shang sha sam ai nga tsun ai. Dalang bungli hpe galaw byin mat wa ai lam madung kaga langai mung naw nga ai. Dai gaw makam masham hpe madung tawn nna amyu shayi ni a rawtjat lam hta ap nawng mayu ai a majaw shi a prat shawng lam hpe lam woi ya ai wa Ireland mungdan na Sister Merry Elton hte hkrum zup lu ai lam rai nga ai.
Merry Elton woi awn ai “Malizup Women Weaver” htunghking dalang bungli hta sak kung gumgai ni hte rau moi na jinghpaw htunghking maka a rung a rai ni hpe shapraw nna maigan de dut ai hku re. Merry Elton gaw shi a mungdan de bai wa na shaloi dai bungli ni mahkra hpe Jan Hkawn Nu hpe matut woi awn sa wa na matu lam pru wa ai hku re.
“Shi gaw wa ra sana shaloi ndai hpaji ni hpe ginlen ya na masha gaw bai nnga, shawng e shi hte rau bungli jawm galaw ai ni nga ai rai tim shi gaw Jan Hkawn Nu hpe bungli yawng ap kau da ai hku re nga ai, tsun mayu ai gaw shi grai kam ai hte Gumgai ni the galoi mung ni ni htep htep nga ai wa re nga yang gaw” nga tsun ai.
8 ning ram adwi gumgai ni hte rau bungli galaw wa ai majaw htunghking palawng ni a gat lawk hte htunghking buhpun palawng ni a ntsa shawa a manu shadan ai lam ni hpe shi chyena wa ai hku re. Maga mi hta mung gumgai ni hte rau matut gindun let dinghkrai magam bungli hpe galaw hpang na matu myit sawn lu wa ai re.
“Tinang a htunghking mung rai, hkringhtawng mung re ai. Jinghpaw maka hpe htunghking n bung ai chyasam a myu ni pyi grai manu shadan ai hpe mu wa ai. Ngai nan mung galaw a let e grai manu danai htunghking hte seng ai bungli re majaw grai myit shang sha sharawng wa ai re. Shakut na, galaw yu na ngu ai myit hte ah dwi ni hte rau dalang 3 hte bungli hpe hpang wa ai re” nga tsun dan ai re.
“Nga ai hte galaw hpang u” nga Merry Elton a hpaji jaw ga hte maren 2011 ning hta sen 20 hte Myitkyina No (1) gat kata kaw gawk shap na madu shapraw ai buhpun palawng ni hpe dut hpang wa ai re. Nnan galaw hpang ai shaloi gaw arang grai ra ai majaw grai yak hkak lai wa ai re. Yu maya dinghku masha sha re ai majaw ra ai arang ni lu na matu masha a kamhpa ai lam hpe n lu wa ai hku re. Bungli dabang kata byin ai mahkang hpe rung hkan e wa hparan ai shaloi hkan nga yang “Na madu wa n lawm ai kun?” nga san ai mung katut yu sai. Kaga lam law law hpe gaw tatut galaw alet e sharin mat wa ai re majaw grai wa yak hkak ai lam n nga ai nga tsun dan ai hku re.
Ya ten hta gaw Small and Medium-Sized Enterprises (SME) kaw na gumhpraw hkoi la lu wa ai sha n ga, Denmark kaw na Responsible Business Fund (RBF) a karum ningtum ai a majaw a rang ni lu wa nna mungdan kata na gat lawk sha n ga Malaysia, Thai, Miwa mungdan de du hkra dut shalai nga sai hku re. Matut na mung seng garan ni hpaw jat mat wa na hte matut ginnoi bungli hku na labri hpun hkai na matu masing galaw da nna, ladat hpaji ni gaw naw hkaja ra na re nga tsun ai.
Anhte wuhpung wuhpawng hta gaw amyu shayi langai a bungli galaw ai tsa lam shadang law malawng gaw nta bungli ni sha rai nga ai. Sut masa lam maga hte seng nna gaw shanhta a madu wa hpe sha kamhpa chye ma ai hku re. Raitim, Jan Hkawn Nuu gaw hpa bungli raitim galaw yu na ngu ai myit hte myit makun ai lam hpe tatut hkrang shala dat ai shaloi shi atsam hpe mu mada wa lu ai hku re. De a majaw mung shi grai arawng la ai hpe mu mada lu ai hku re.
“Myu shayi ni yawng mung kaja wa galaw ga nga yang lu galaw ma ai re. Yak hkak ai lam gaw masha shagu nga ai le amyu shayi ni hta mung nga ai amyu shadang ni hta mung nga na sha re. Raitim amyu shadang ni sha galaw na re ngu ai gaw n jaw ai le i. Grau sawng ai langai gaw, dinghku langai hta anhte amyu shayi ni gaw hpa mung n mai galaw ai nga ningmu ni hpe moi prat ban hte prat ban ginlen dawk bang da hkrum ai re. Nkau mi bai rai yang gaw dinghku bungli dang yang she mai ai, dinghku bungli mung dang ra ai le i. Tinang lu galaw ai gaw tinang a dinghku a matu mung akyu rawng ai. Ngai langai wa lu galaw ai a marang e tinang a npu hta dinghku nta masha law law hpe mung lam woi lakawn lu ai” nga tsun dan ai hku re.
Makam masham hte seng ai shawa bungli hta apnawng ai gaw shi a myit sharawng ai lam langai rai nga ai. Ya ten du hkra 6 ya shana daw shagu Catholic Kanu Num hpung ni a Gumhpraw mahkawng magam bungli ni hta aten jaw apnawng nga ai hku re. Da da hpaji ginlen ya ai wunkat hpe mung hpyenyen dabang ni hte kaga amyu shayi ni a matu sharin ya nga ai rai nna, tatut hta wunkat jawng ngut ai marai (40) jan rai sai hku re. Magam bungli law law hpe hparan hpareng lu ai lam hte seng nna “Bungli law law hpe galaw lu atsam nga ai saranum hpe grai yu n-gun lu ai” nga shi kaw bungli sa galaw nga ai Sagaing maga na num shayi sha langai tsun ai hku re.
“Nkau mi gaw tatut galaw nga ma sai, daw chyen mi gaw ndai da da bungli hte kanbau nga ma sai hku re. Namti kaw na ni mung kade tsan tim sa ma ai. Shakut ai ni hpe yu di na mung kaja wa grai myit pyaw ai, kabu ai” nga tsun ai hku re.
#businesswomen
#share
#followers
#shayichannel
