Ningsin rim rim re ai ten, chyinghkyen nta byak byak re ai kata, wan shadaw a shingla hte amying ahkyeng re hpawmi jan a mani sumsai nsam hpe mu lu dat ai. Pan Tsawm gaw asak 40 grup-yin re hkum gawng shing-yan lasi si rai nna, mani sumsai myiman n sam hte kaw lakai rai tsun shaga chye ai jan rai lu ai.Shi gaw Mogok ga kaw nna, ningrum ningtau wa nga ai Jinghpaw mung de htawt sit wa nna ma marai 8 hpe bau maka taw ai kanu langai rai nga ai. Shi gaw kasha kru ngu na ma shata 2 re ai ten kaw na shawa num prat de du mat wa ai re. Ningrum ningtau wa mawdaw adawt nna ginshang nra hkra mat ai hta tsi tsi ra ai, dai sha n-ga masha si hka wa ra ai, dai zawn re mayak ni gaw Pan Tsawm hpe shawa num byin wa na de yawng shangun ai lam madung rai nga ai.Madu wa mawdaw adawt ai a majaw htawng hkrat mat ai hpang “Madu wa mung Nam Ting (နန်တိန်) kaw mawdaw adawt ai majaw hkyuk rawng ra mat ai, lu malu gumhpraw ni ma mat, an nu ni sha na matu sha n-ga hkyuk rawng nga ai madu wa a matu mung lusha manu hte hka shin na matu hka manu du hkra madi shadaw ya ra ai.”“Nu shana gat na shat seng kaw bungli sa galaw na” ngu ma ni hpe tsun kau da ai. Kaji dik ai ma hpe woi ya na matu ma woi hpe shabrai 8,000 jaw nna shaga da ai. Adum sha re hpe tsun ga nga yang, dai shana gaw manang ni tsun ai hku myit shaja da nna galaw hpang dat ai re. Nta wa ai shaloi gaw gumhpraw 30,000 lawm wa ai.Shani e galaw ai bungli hte sha dum nta masha ni lu sha na n mai byin ai majaw, 2014 ning, June shata 14 ya kaw nna ningsin e ahpre sha ra ai amu (shawa num) galaw hpang ai lam hpe Pan Tsawm bai tsun dan ai. Shi a myi prwi ni hta mu lu nga ai. Shi a malap n lu ai n htoi hpe shi a myi prwi ni hta mu ya lu nga ai. Dai shana lu wa ai gumhpraw 30,000 gaw htaw wa htaw sa jahpu 3000, ma woi manu 8000 jaw kau nna ngam ai gumhpraw hte annu ni marai 7 a matu lusha manu ngam ai hpe myit let yup pyaw lai wa sai.“Kalang marang shani hkan ma ni hpe nta bungli woi galaw, nchyang chyang sha nna pu ba ai majaw, nsin bungli galaw shaloi yup pyaw yup malap mat wa ai ten, gumhpraw n lu la ai sha n-ga tinang lawm sa ai gumhpraw ni phone ni yawng lagu la hkrum nna, nta wa lam jarik shamat ai ten mung nga yu sai”. Lam jarik n lu nna lam hkawm wa ra ai majaw, jahpawt gat (3am hpaw ai) dut hpang taw ai ten hta she n ta de bai du wa ai.Ding yang kanawn mazum ai ni mung masha hpan hkum ai, nkau mi gaw makawp maga (condom) lang na matu tsun tim n hkraw ma ai. Tsa nang taw teng hkan rai yang du manat nna mazut roi rip hkrum ai majaw manam jarawp madu ni hkye la ga yu sai lam hte masha hpan hkum (makam masham hpung na masha ni) hte hkrum ga ai lam hpe mung mani hpa hku tsun dan ai. Lani mi na nhtoi gaw Pan Tsawm yen nu ni a gammaka gin chyumchyat mat ai aten ngu pyi tsun mai nga ai, shawoi sa sa re ma woi jan mung n sa mat, ma machyi ai hte tsi tsi manu ra ai majaw, Pan Tsawm gaw cycle carry shaga let wanleng ginra hta nga ai jinghku ni kaw machyi taw ai ma hpe sa ap da kau nna, shi a bungli shara de sa mat wa ai.Shawoi na zawn Myitkyina shana gat de du ai shaloi cycle carry hpe “bai wa yang she gumhpawn pawng la u yaw” ngu tsun nna masha lat nga yang “Wang rim hkrum ai. Anhte manang ni marai 10 hte rau masat 2 pyada dap de du mat wa ai “Dai shana gaw shawoi na zawn gumhpraw mayun jaw nna lawt lam tam tim n mai. Machyi taw ai ma hpe shaga ya na matu “Nye a kasha machyi taw ai, ma kaw si na sai, masha ni nta kaw sha tawn kau da ai majaw karum ya na matu gat makau na cycle carry wa hpe naw wa shaga ya na hku hpyi nyem tim aloi sha n hkraw ya” balik wa gaw “nang masu sha taw i? na kasha ni yawng hpe chyahkrai ma ginra de sa kau ya na, hkyuk (3) ning mai jahkrat kau ai chye i?” ngu na daru hkrum ai lam hpe tsun dan ai.Hpang jahtum gaw “pe 10 grup-yin re ai hkyuk kata de nye a kasha hpe shaga sa wa ya ma ai, shana tup machyi n zim ai hte madai taw ai” Pan Tsawm a matu gaw dai shana gaw nhtoi lawan htoi na hte pahkam lu na matu sha kyu hpyi shalai ai lam hpe, lwi hkrat wa ai myi prwi hpe lata hte gatsut let tsun dan ai. Shawa num galaw sha ai hpe ma ni n chye hkra bu hpun palawng makoi bang lang nna Myu de du yang she bai shaw hpun la ai.Makau grup yin a mara tam ai, dinglun ai, tsun jaw ai mahkrum madup hpe tsun dan ga nga yang; Ngai hpe mu ai hte “Aww ie ie u!” nga, lam hkan mu yang mung “Htwi!” nga, bungli sa ai manam jarawp mying hpe lakap nna mung “Tittsa Shin Ma, Aya Ma Gyi, Tsittsa” nga tsun nna a myu myu jahpoi ma ai. Pan Tsawm a kasha asak 13 ning re ma hpe mung “shawa num a kasha shawa num sha tai na re” nga tsun hkrum ai majaw jawng de sa shawk ai raitim “jawng kaw na lam ni n-ta de shi hkum htawn ngu htet da ai, mara hkum tam mu” ngu ai mahtai hte sha bai nhtang wa ra ai lam hpe tsun dan ai.Ya ten Myitkyina kaw, kahtawng buga hkan na du wa ai hkawn ram shayi sha ni gaw shawa num bungli dabang de du shang wa ma nna shanhte a ningbaw wa a nta nga let, bungli galaw, bai tam bai jai, gumhpraw hka ni kap rai nga ma ai. Shawa num kasha ni gaw phone ra ai majaw shanhte a ningbaw wa kaw gumhpraw hkoi la nna phone mari la ai majaw shani shagu hka wa ra ai. Nkau mi gaw poiza wa jau nna gumhpraw sawn la ya ai majaw shata shabrai mung n lu ai sha galaw taw ra ai ni mung nga ai. Dai hta n ga manam sa ai ten jau n du ai majaw, yup nga nga ai majaw nga ga baw a myu myu hte gumhpraw di la kau ai hpe mung hkrum sha nga ai.Hprawng lawt mat ai ni nga tim law malawng gaw shanhte a lata na n lu lawt ma ai, kaga shara de bai dat di bungli galaw shangun ai ni mung nga ai nga mying gang n lu ai wa langai tsun dan ai hku re. Ya ten hta shawa num bungli manu mung moi na zawn masa n hkrak ai. Shim lam a majaw shana de shinggan pru ai ni mung nau n nga, manam ni mung lam ntsa na shawa num ni hpe n kam mat ai, Shawa num ni a baw tai ai ni, manam jarawp ni hte matut da ai masha ni sha bungli loi hkrak ai lam hpe” Moi na zawn masa n pyaw majaw galaw lu galaw sha nau n hkrak mat sai” ngu tsun dan ai re.Ya hpang daw de shanhte hpe garum taw ai uhpung ni mung ja gumhpraw madi shadaw ai lam ni hta masat shadang ni nga wa ai majaw gan shingbyi machyu na shara n nga ai majaw” Kahtawng hkan na sa ai numsha n kau gaw lam makau hkan yup, shana de du yang she manang na n ta hkan buhpun palawng galai la shakya la di shana bungli galaw ra ai.”Nkau mi gaw bu kawp, palin kawp dingsa ni hta dut n na kan bau ai ni mung nga ai. Daini Myen mung hta grin nga ai tara upadi (1949 upadi) hta Ginwang balik kaw na ndau shapraw ai upadi gaw htawng dam grau law ai, gumhpraw dam ni grau law wa ai hte Upadi ni hkrang shapraw lu na yak mat ai majaw shawa num ni a matu mang hkang langai rai taw ai re.Pan Tsawm tsun dan ai, balik hpe shiga jaw ai masha ni gaw bungli na wa ai mi rai rai, lam hkan shara mi hta hkrum ai rai rai “Hey Tit Sar Mah, ngai hpe hpalap naw daw u le, lam jasan manu naw jaw u nga hpyi ai majaw kalang marang rai yang nta wa na matu kaw na pyi bai garan jaw kau da ra ai”Yangon kaw bungli galaw nga ai shawa num ni a matu mung shiga jaw (sh) balik hpe shiga jaw ai ni gaw manam zawn hkrang la di shawa num ni hpe hkan rim ai, gumhpraw hpyi sha ai, hkumshan amyat htuk ai lam ni mung mayak langai rai nga ai lam hpe mung chye lu ai re.Pan Tsawm gaw prat bung ai kanau kana ni hpe kap bra ana n byin na matu makawp maga (condom) lang na matu, ana kap wa yang mung hkam ja dap ni hte matut mahkai ya nga ai lam ni hpe” hkam ja lam n nga ai ni hpe garum ya ai TOP, AZG wuhpung ni kaw sa nna sai jep yu, bawng ban jahkrup yu na matu tsun dan ai. Tsi la lu ra ai ni hpe mung tsi lu la na matu hkan galaw ya nga ai” prat a mayak mahkrak ni hpe ninghkap tawt lai let shawa num prat kaw nna shakut shaja dating let ya aten hta gaw prat bung ai manang ni hpe karum ya nga ai apnawng langai rai nga sai re.Raitim lam shagu hta yak hkak nga ai a ten hta shawa num ni a bungli hpe bungli langai hku na hkap la lu na matu, shanhte ra nga ai hkamja lam machye machyang, karum ningtum ni hpe matut lu la na matu n dep hkap lu shi ai rai timmung, masha hpe masha zawn mu let, jawm karum madi shadaw ya ai wuhpung wuhpawng byin tai wa hkra masha shada hkrang shapraw sa wa ga ngu tang madun dat mayu n ngai law.
Laika ka ai – Jinghpaw Numsha
