Num sha kasha alat re majaw, nta ting a tsawra myit hpe hkam la let kaba wa ai hku re. N myit mada ai sha masum ning hpring ai shani gaw, a prat hta galai shai mat ai hku re. Dai shana e, hkum kahtet ai n yawm ai majaw Manmaw tsirung kaba de du mat wa nhtawm masum ya tup tsirung hta malap mat ai. Tsi du ni gaw, “Ma ndai asak n hkrung lu sai, bai dum wa tim bawnu n gring mat na re, nta woi wa mayu yang mai woi wa sai” nga nna a nu hpe tsun ai raitim, a nu gaw myit hpe n shayawm kau ai sha, hput di kyu hpyi let tsirung hta matut tsi tsi hkam la na matu dawdan ai. Mali ya ngu na shani gaw bai dum wa sai, raitim lam n lu hkawm mat sai hku re. (Polio virus infection) a majaw lasaw lasa ni nya mat nna, lam n mai hkawm mat ai hku re. Ngai ndai zawn byin mat ai marang e, makau grup-yin ni gaw Nu hpe tsun ai lam ni grai nga lai wa sai. Raitim, Nu gaw myit n daw ai sha Myen mung lawu ga de tsi tsi lajang na matu ngai hpe shingma hta ba rai nna, shi dang di ai made mi tsi tsi woi hkawm lai wa sai. Myen mung ka-ang daw Magway hta Myen tsi Sara hte tsi tsi taw nga yang, a dwi n nga mat sai shiga na lu ai hte nta de wa mat ai. Nta kaw mung tsi lu ai daram gaw bai matut tsi tsi byin ai.
Jawng lung hpang na ten du wa ai shaloi, Nu gaw ngai lam n lu hkawm ai hpe madung n da ai sha kaga ma ni zawn jawng bang na matu Nu myit dawdan ai hku re. Makau grup-yin ni gaw “n tai n mai re ma hpe jawng lung shangun yang hpa akyu nga na” nga nna tsun ai lam ni nga tim, Nu gaw myit n daw ai sha ngai hpe jawng lung lu na lam hpe dawdan ai. Nu gaw myit n daw ai sha tsawra myit hte ngai a ntsa myit mada let lam woi wa ai majaw, hpaji hpe htum hkra sharin la lu sai hku re.Hpaji sharin ai lam hta, jawng kaji kaw na tsang mali du hkra gaw mare lawk kaw hpaw da ai lawu tsang jawng hta sharin hkam la ai. Tinang lawk kaw sha re ai majaw, lawu tsang jawng lung ten gaw mayak mahkak ni grai n nga tim, lahta tsang jawng lung hpang mat wa ai shaloi gaw mayak mahkak ni hkrum katut hpang sai hku rai nga ai. Ga shadawn tsun ga nga yang, namdum hte jawng gawk tsan ai zawn re lam ni re. Namdum sa na yak hkak ai majaw, jahpawt nta kaw ngut hkra sa kau nna shani tup n sa sai sha, shana daw jawng yu ten nta du yang she sa byin ai. Numhkring sa ten du wa ai shaloi mung, kaga ni zawn namdum de sa nna galai na matu n mai byin ai majaw, shani tup dai hku sha nga kau ai. Makau kaw dung ai manang ni hpe pyi grai a-gam lai wa sai.
Tsang langai hpang langai lung mat wa ai shaloi gaw, laika sharin gawk ni mung htawt ra ai lam ni nga ai. Npu htap kaw nna ntsa htap de htawt sharin ra ai. Ntsa htap de laika sharin gawk ang ai ten gaw, shani tup jawng gawk kaw sha nga byin ai. Jawng a shamu shamawt lamang ni langai hta mung n lu lawm ga ai. Ga shadawn- jawng up kaw na langai ya shani shagu jawngma ni hpe hkrum zup ai lamang zawn re, jawng a shamu shamawt lam ni hta mung n lu shang lawm lu ai hku rai nga ai.Lahta tsang jawng ngut nna dakasu lung ten mung dakasu namchyim hpe n lu hkam sha ai. Laika buk ni hpe sha manang shatai let, jawng gawk kata hta sha nga byin ai. Dai ten hkan nga yang, htu leng (wheelchair) n byin shi ai majaw grai yak hkak ai lam hkrum lai wa sai. Nta masha yawng a tsawra myit a majaw sha, hpaji htum hkra hkaja la lu ai re.Jawng ngut ten hta, myit ni wam dam ai ten ni mung nga lai wa sai. Bungli galaw mayu tim hkum hkrang Gaw Ning ja n re ai ni pyi bungli tam yak ai ten, anhte zawn gaw ning ja ni a matu gaw grau sawng sai le i. Makau grup-yin jinghku jingyu ni gaw, nta kaw sha rai chywi nna nga na matu tsun ai lam nga tim, ngai na hkam la ai lam gaw masha prat ngu ai grai manu dan ai. Asak aprat naw ram ai ten, nta kaw sha aten n kam shama ai ngu hkam la ai. Manang ni hpe tsun dan yang gaw, mani hpa langai zawn gaw rai mat ai. Raitim a nu hte a wa gaw, ngai byin mayu ai lam hpe kam ya ai majaw ngai byin mayu ai hpe galoi n shayawm ai
2011 ning hta, n myit mada ai sha Yangon mare kaba de yu wa na mahkrun nga wa ai majaw Yangon de yu mat ai. Yangon du ai hte rau bungli hkan tam ai. Dai ten hta gaw computer ngu ai gaw n hkra yu ai le i, English ga nga yang grau sawng. Bungli shaga ndau laika hkan mung hkamja zetlet ai rai ra ai nga lawm ai majaw bungli grau tam yak ai. N myit mada ai sha, Karai Kasang a chyeju hte INGO langai hta bungli sharin masha(Intern) shaga taw ai hpe chye la lu nna shawk dat ai shaloi lata la hkrum nna bungli galaw hpang lu ai.
Prat hta kabu dik ai aten langai rai lai wa sai hku re. Bungli de shani shagu sa ai lam hta, kaga ni zawn bus jawn na yak ai majaw taxi hte sha sa byin ai. Taxi gau ai nkau mi gaw, ngai zawn gaw ning ja ni hpe htaw yang gam n kaja ai nga nna lam kaw jahkrat kau da nna, kaga taxi bai htawt jawn ra ai mayak ni mung hkrum lai wa sai. Ngai nga ai shara gaw htap 7 kaw re. Nye kahpu ni, kanau ni hte nta wa n rum ai ten ni hta gaw, htap 7 de ngai hkrai dung di htawt sit nna lung ai ten mung law law lang re. Shanhte rau bungli na n ta du ai ten gaw shahte wa bai tau la ma ai.
Kaga mayak ni mung she tsun ga nga yang gaw hkai n htum ai maumwi re. Hkam la lu ai chyeju law law hta na langai mi gaw, manaw manang ni hte nta masha ni tsawra let, tsawra myit hte lanu lahku la ai majaw sha rai nga ai. Pat shing dang hkrum ai lam n nga ai sha, wanglu wanglang galaw mayu ai hpe madi shadaw ya majaw, yak hkak ai lam ni hpe lai di lu ai hku re. Ngai sharawng ai hpe mung n dut n dang galaw lu ai. Ga shadawn, hkrun lam hkawm yang Myen mung kata wheelchair hte hkawm na matu loi yak ai lam ni nga ai raitim, ngai hkawm na nga yang pat shingdang ai lam n nga ai.
Ginchyum dat ai lam hpe, daw lahkawng hku garan nna hpungdim dat mayu ai.
Nambat langai gaw dinghku hta kashu kasha ni hpe lachyen lahka n nga ai sha tsawra myit arang bang let bau maka na ahkyak ai re. Gaw ning ja ma, Gaw ning ja n re ai ma, byin ai, n byin ai ndai zawn lachyen lahka ai lam n nga ai sha, maren mara tsawra myit hte bau maka na ahkyak ai hku re. Ngai ya na zawn galaw lu ai lam gaw chyeju hte sha rai nna, nta masha ni a tsawra myit hte yakhkak ai lam ni hpe lai di lu ai hku re.
Nambat lahkawng hku na n-gun jaw mayu ai gaw, anhte yawng hpe Karai Kasang hpan da ai lam hta nkau mi gaw shan hpraw ai, nkau mi gaw shan chyang ai, nkau mi gaw galu ai, nkau mi gaw kadun ai, Gaw Ning Ja, Gaw Ning ja n re ai, ndai zawn n bung ai lam hta mahta nna lachyen lahka galaw na matu n re. N bung hkat ai lam hta mahta nna lachyen lahka byin taw ai lam ni hpe she yawng jawm lakawn ra na re ngu tang madun let hpungdim dat sai law. 
